Få ting gjort med Wunderlist

Få unna gjeremål meir effektivt ved bruk av metoden "Getting Things Done" og listeverktøyet Wunderlist!

Getting Things Done (GTD) er ein metode skildra av David Allen i boka Getting Things Done: The Art of Stress-Free Productivity (2001). Føremålet med metoden er å auke produktiviteten og redusere stress gjennom å organisere idear og gjeremål betre ved å samle, prosessere, organisere, og revidere dei, og få dei gjort!

GTD kan nyttast både på arbeid og elles i livet. Dei fleste av oss har vel ei eller anna gong nytta lister for ting me må gjere, som til dømes å gå på butikken for å handle. Allen går lenger enn denne enkle bruken av lister og seier at alt ein skal gjere må skrivast ned i lister og at ein jamleg må gå gjennom og nytte ulike synsvinklar på oppgåvene for å kunne sortere, prioritere og fokusere best mogeleg. Hovudprinsippet er å få gjeremåla ut av hovudet slik at hjernekapasiteten vår vert nytta til å fokusere på sjølve oppgåva, ikkje til å ta seg av påminningsoppgåver. Ved å plassere idear og plikter utanfor hovudet vert det Allen kaller psykisk RAM frigjort og kan nyttast til faktisk å få ting gjort og til å vera kreativ (Wikipedia, 2011). Sjølv om GTD umiddelbart luktar litt som ei av mange dårlege amerikanske sjølvhjelp-bøker har metoden fått stor merksemd, og for mange som jobbar med kunnskap og informasjon er boka nesten som kultbok å rekne. Boka finst på norsk med tittelen Få ting gjort: kunsten å være produktiv uten å stresse (2006).

Allen anbefaler å bruke papir og blyant, men det finst ei rekke program som kan assistere deg i å halde orden på oppgåvene dine ved hjelp av datamaskina eller smarttelefonen din. Dette kan vera alt frå enkle To-do lister (Things, Google Tasks, Ta-da List, Omnifocus ) til store prosjektstyringsverktøy.

Wunderlist er ein app (eit lite program ein laster ned frå internett) som enkelt lar deg organisere oppgåvene i lister. Wunderlist støtter prinsippa i Allens metode og lar deg sortere oppgåvene og fastsetje kva dag ein skal gjere kva og også stjernemerke oppgåva om ho er ekstra viktig. Wunderlist køyrer på dei aller fleste plattformer og synkroniserer oppgåvene over nett, slik at listene dine alltid er oppdaterte dersom du bruker fleire datamaskiner eller smarttelefon. I Wunderlist kan du samarbeide med andre gjennom å dele listene med andre brukarar.

Kom igang!

Når du har skaffa deg eit verktøy du liker kan du starte med å få alt du kjem på av små og store oppgåver ut av hovudet og inn i innboksen i verktøyet. Hugs og å ta med oppgåver frå eksisterande lister. Deretter bør du bruke litt tid på å organisere oppgåvene i kategorier og lister og dele alle ting opp i individuelle, målbare oppgåver (bruk verb) som skal utførast. Tilslutt bør du setje prioritering på oppgåvene; er dette noko eg kan gjere med ein gong, seinare i dag eller skal eg avsetje tid i kalenderen til å gjere det seinare i veka? Når oppgåvene er organisert og prioritert skal innboksen vere tom og du skal kunne sortere på oppgåver du skal gjere idag og setje igang!

Det er bra å sleppe å gå rundt å hugse alt ein skal ha gjort, og noko av det beste med GTD-verktøy er at når ein haker av ved ei utført oppgåve så forsvinn ho inn i har gjort-arkivet, og ein føler seg effektiv og kan konsentrere seg om neste oppgåve!

Kilder:

Sverre Helge Bolstad

Publisert 11.11.2011, sist endret 05.12.2011 - 20:49